Aucuri ti bbona Pasca
Oh matonna, Crištu mia,
propia mo’ mi nni šta scia
cu ti spettu all’artari
ca ndi eram’a spusari,
e tu nveci štai chiantatu
alla croci ti Pilatu
pircè quandu vai mbriacu
pienzi cu faci lu macu.
“Matale’, non à capitu
ca iu vògghiu mueru zitu?
L’àggiu tittu e rripitutu
ma tu no mma mai critutu.”
Ma tu sienti štu fitenti
cce pinzieru teni a menti…
iu ca t’àggiu tatu tuttu
e di mei lu mègghiu fruttu;
t’àggiu tata poi nna manu
cu ti pozzu fa crištianu
ca nisciunu ti critia
ci ticivi: “so’ Mmissia”.
Vi ci scindi ti dda croci
e camini toci toci
ca già tutti li nvitati
ndi šta spèttunu mmutati;
forza, sbrìchiti, camina,
ci no viti, šta matina…
mi nni pàiu li pitati
e ti bbìnchiu ti mazzati.
“Matale’, ti l’àggiu tittu,
poi, ccussì già štava scrittu,
mo’ no ffa’ la nvirdicuta
tantu ieri già scinduta.
Cinturrio’ cu quedda lanza
carca forti ntra la panza,
fammi fa’ nna bbella morti
cu mi scampa ti ‘sta sorti.”
(Catone Tersonio)
Iscriviti a:
Commenti sul post (Atom)
Nessun commento:
Posta un commento